साइन रेसुंगा र पूर्णिमा विकास बैंकबीच एकता प्रक्रिया शुरु



बुटवल : रुपन्देहीमा केन्द्रीय कार्यालय रही सञ्चालनमा रहेका दुई ठूला विकास बैंकले एकता प्रक्रिया थालेका छन् । बुटवलमा विकास बैंकको रुपमा स्थापित साइन रेसुंगा डेभलपमेन्ट बैंक लिमिटेड र भैरहवामा स्थापित पूर्णिमा विकास बैंकबीचको एकता प्रक्रिया शुरु भएको आइतबार जानकारी गराइएको छ ।

साइन रेसुंगा डेभलपमेन्ट बैंकका अध्यक्ष राजेन्द्रप्रसाद श्रेष्ठ र पूर्णिमा विकास बैंकका अध्यक्ष सुरज उप्रेतीले आइतबार संस्था प्राप्ति (एक्विजिशन) सम्बन्धी प्रारम्भिक सहमतिपत्रमा हस्ताक्षर गरेसँगै एकता प्रक्रिया अघि बढेको घोषणा गरिएको हो ।

एकतापछि पनि एकीकृत बैंकको नाम भने ‘साइन रेसुंगा डेभलपमेन्ट बैंक लिमिटेड’ राख्ने सहमतिपत्रमा उल्लेख गरिएको छ । साथै एकतापछि साइन रेसुंगा डेभलपमेन्ट बैंक राष्ट्रियस्तरको बैंक हुनेछ भने बैंकको केन्द्रीय कार्यालय बुटवलमा स्थापना गरिने छ ।

साइन रेसुंगाको एक अर्ब ६२ करोड २६ लाख रुपैयाँ चुक्ता पूँजी रहेको र ५५ करोड १२ लाख रुपैयाँ चुक्ता पूँजी भएको पूर्णिमाबीच समझदारी पत्रमा हस्ताक्षर भएको छ । साइन रेसुंगाको निक्षेप १६ अर्ब १० करोड २३ लाख रुपैयाँ र पूर्णिमाको तीन अर्ब ३५ करोड ६१ लाख रुपैयाँ रहेको छ भने कर्जातर्फ साइनको १४ अर्ब ५२ करोड ३६ लाख रुपैयाँ र पूर्णिमाको तीन अर्ब चार करोड ६७ लाख रुपैयाँ रहेको कार्यक्रममा जानकारी गराइएको थियो । साइन रेसुंगा डेभलपमेन्ट बैंकका ४० शाखा छन् भने पूर्णिमाका १२ वटा शाखा कार्यालय रहेका छन् ।

यसअघि साइन रेसुंगा बैंकले प्युठानलाई कार्यक्षेत्र बनाई सञ्चालनमा रहेको गौमुखी विकास बैंकलाई गाभेको थियो । त्यसैगरी रुपन्देहीमा स्थापित साइन र गुल्मीमा स्थापित रेसुंगा एकापसमा गाभिएर साइन रेसुंगा डेभलपमेन्ट बैंक बनेको हो ।

यस क्षेत्रका १० जिल्लामा कार्यक्षत्र रहेको साइन रेसुंगा र तीन जिल्लामा मात्र कार्यक्षेत्र रहेको पूर्णिमाबीच एकता भएसँगै थप कार्यक्षेत्र विस्तारका लागि सघाउ पुग्ने विश्वास बैंक सञ्चालकले लिएका छन् ।

प्रतिकृया दिनुहोस


Leave a Reply

Your email address will not be published. Required fields are marked *

error: